اشعار/قطرۂ اشکِ عزاء

شاعر: مولانا محمد ابراہیم نوری

حوزہ نیوز ایجنسی|

کیا بتاؤں میں کہ کیا ہے قطرۂ اشکِ عزاء

حق کا اعلان بقا ہے قطرۂ اشکِ عزاء

دم بہ دم آواز دیتے ہیں انیسی مرثیے

اک مکمل مرثیہ ہے قطرۂ شکِ عزاء

بہتا دریا، چشمۂ زمزم، سمندر، آبجو

ہر کوئی تجھ پر فدا ہے قطرۂ اشکِ عزاء

طاقتِ مظلوم ہے اور ظلمِ ظالم کے خلاف

احتجاجِ برملا ہے قطرۂ اشکِ عزاء

زیب و زینِ مرتضیٔ زینب کی چادر کی قسم

زینتِ فرشِ عزا ہے قطرۂ اشک عزاء

یادِ شہ میں دل سے آنکھوں کے صدف میں آگیا

اس میں پھر گوہر بنا ہے قطرۂ اشکِ عزاء

برگِ عصیاں یک بہ یک نخلِ عمل سے جڑ گئے

آنکھ سے جوں ہی گرا ہے قطرۂ اشکِ عزاء

دشمنِ شبیر کے دل میں لگا دیتا ہے آگ

کربلا کا معجزہ ہے قطرۂ اشکِ عزاء

یہ دکھاتا ہے ہمیں اک کاروان تشنگاں

ایک ایسا آئینہ ہے قطرۂ اشکِ عزاء

اللہ اللہ زینتِ رومالِ زہرأ بن گیا

تجھ کو کیا رتبہ ملا ہے قطرۂ اشک عزاء

اب یقیناً مجھ پہ کھل جائے گا بابِ مستجاب

اب دعا کا واسطہ ہے قطرۂ اشکِ عزاء

جانتی ہے راز یہ چشم عزادار حسین

باعث قرب خدا ہے قطرۂ اشک عزاء

کشتیٔ اعمال میری غرق ہو سکتی نہیں

شکر اسکا نا خدا ہے قطرۂ اشکِ عزاء

وہ بھی نوریَ کربلا کے دائرے میں آگئی

جس زمیں میں ضم ہوا ہے قطرۂ اشکِ عزاء

۔۔۔۔۔۔۔۔۔۔۔۔۔۔۔۔۔۔۔۔

از قلم: مولانا محمد ابراہیم نوری قمی